«Dinamo» va «Astana» (2:2) o‘rtasidagi uchrashuvdan keyin samarqandliklar bosh murabbiyi Vadim Abramov klub matbuot xizmatiga intervyu berdi.

«O‘yin tomoshabop bo‘lgani tushunarli, ammo vaziyatlarni golga aylantirish kerak. O‘yinni qanday boshlaganimiz menga yoqmadi. Faqat gol o‘tkazib yuborganimizdan keyin o‘ynashni boshladik. Ikkinchi bo‘limdagi vaziyatlardan foydalanish lozim edi. Bunday raqiblarga qarshi o‘yinlar jamoamiz uchun tajriba bo‘ladi.

Raqiblar haqida nima deyish mumkin? Yaxshi jamoalar. Biz ham maydonda ularga jang taklif qildik. «Istiqlol» Dubayga kelmagani va ular bilan 17 fevraldagi o‘yin bo‘lmagani biroz xafa qildi. Taqvim o‘zgarib ketdi. Bugun «Astana»ning iltimosiga ko‘ra, 90 daqiqa va yana qo‘shimcha 30 daqiqa o‘ynadik. Ertaga esa «Rostov» bilan o‘yin o‘tkazishga kelishgandik, bugungi o‘yindagi charchoq Rossiya klubiga qarshi ertangi bahsga ta’sirini o‘tkazadi.

Ratinyoning holati? Umid qilamanki, bu jiddiy emas, u o‘zini almashtirishni so‘radi.

Jamoa yangi mavsumga qay daraja tayyor? Buni vaqt ko‘rsatadi. Chunki o‘rtoqlik boshqa, rasmiy o‘yinlar esa boshqa narsa.

Yangi o‘yinchilarimiz? Ular kirishib ketishdi, bugun yosh o‘yinchimiz (Oybek O‘rmonjonov) gol urdi, bu unga ijobiy ta’sir qiladi. Yoshlarimiz tarkibdagi tajribali yigitlarga raqobat paydo qila olishiga umid qilaman.

Yangi transferlar? Yangi legioner hujumchi viza bilan bog‘liq muammo sababli Dubayga kela olmadi, Toshkentdagi yig‘inimizga kelib qo‘shiladi. Umid qilamanki, u jamoamizni kuchaytiradi», - deydi Vadim Karlenovich.