O‘zbekiston milliy terma jamoasi Osiyo qit’asida futbol bo‘yicha Jahon chempionati 3-saralash bosqichining 7-turida Qirg‘iziston termasi bilan raqobatlashadi. “A” guruhidan o‘rin olgan mazkur uchrashuv 20 mart kuni “Bunyodkor“ stadionida Toshkent vaqti bilan soat 21:00 da boshlanadi.

Uchrashuvni yaponiyalik Araki Yusuke boshchiligidagi hakamlar guruhi boshqarib boradigan bo‘ldi. O‘yinda A.YUsukega qanotlarda hamyurtlari Mihara Jun va Vatanabe Kota yordam beradi.

Eslatib o‘tamiz, O‘zbekiston milliy terma jamoasi 6-turdan so‘ng o‘z guruhida 13 ochko jamg‘arib, ikkinchi o‘rinda bormoqda. 16 ochko to‘plagan Eron termasi peshqadamlik qilayotgan bo‘lsa, BAA 10 ochko bilan uchinchi pog‘onadan joy olgan. Qatar termasi esa 7 ochko bilan 4-o‘rinni band etgan. Qirg‘iziston 3, KXDR 2 ochkoga ega bo‘lgan holda quyi pog‘onada qolmoqda.

Ma’lumot o‘rnida: 2026 yilning 11 iyun-19 iyul kunlari AQSH, Kanada va Meksika mamlakatlarida bo‘lib o‘tadigan futbol bo‘yicha Jahon chempionatida 48 ta jamoa ishtirok etishi belgilangan. Qit’amizga to‘g‘ridan-to‘g‘ri 8 ta, qit’alararo pley-off o‘yinlari orqali esa bitta o‘rin ajratilgan.