Ўзбекистон миллий терма жамоаси Осиё қитъасида футбол бўйича Жаҳон чемпионати 3-саралаш босқичининг 7-турида Қирғизистон термаси билан рақобатлашади. “А” гуруҳидан ўрин олган мазкур учрашув 20 март куни “Бунёдкор“ стадионида Тошкент вақти билан соат 21:00 да бошланади.

Учрашувни япониялик Араки Юсуке бошчилигидаги ҳакамлар гуруҳи бошқариб борадиган бўлди. Ўйинда А.Юсукега қанотларда ҳамюртлари Миҳара Жун ва Ватанабэ Кота ёрдам беради.

Эслатиб ўтамиз, Ўзбекистон миллий терма жамоаси 6-турдан сўнг ўз гуруҳида 13 очко жамғариб, иккинчи ўринда бормоқда. 16 очко тўплаган Эрон термаси пешқадамлик қилаётган бўлса, БАА 10 очко билан учинчи поғонадан жой олган. Қатар термаси эса 7 очко билан 4-ўринни банд этган. Қирғизистон 3, КХДР 2 очкога эга бўлган ҳолда қуйи поғонада қолмоқда.

Маълумот ўрнида: 2026 йилнинг 11 июнь-19 июль кунлари АҚШ, Канада ва Мексика мамлакатларида бўлиб ўтадиган футбол бўйича Жаҳон чемпионатида 48 та жамоа иштирок этиши белгиланган. Қитъамизга тўғридан-тўғри 8 та, қитъалараро плей-офф ўйинлари орқали эса битта ўрин ажратилган.