«Roma» Rimdagi «Olimpiko» stadionida A Seriyasining 26-tur doirasida joriy mavsumning autsayderlaridan biri – «Monsa»ni qabul qildi. Uchrashuvga neapollik hakam Fabio Mareska boshchilik qildi. Uy jamoasi ishonchli g‘alabaga erishdi – 4:0.  

«Roma»ning asosiy tarkibidan maydonga tushgan o‘zbekistonlik hujumchi Eldor Shomurodov 10-daqiqada Aleksis Salemakersga golli uzatma berdi. 32-daqiqada esa uning o‘zi raqib darvozasini ishg‘ol qildi. 73-daqiqada ispaniyalik Anxelinyo hisobni yirik ko‘rinishga keltirdi, 88-daqiqada esa yarim himoyachi Brian Kristante yakuniy natijani belgiladi. Shomurodov mazkur o‘yinda 70-daqiqada zaxiraga olindi.

Ushbu g‘alaba «Roma»ga mavsumdagi ochkolar sonini 40ga yetkazish imkonini berdi. 26-tur yakunlariga ko‘ra, rimliklar turnir jadvalida 9-o‘rinni egallab turibdi. «Monsa» esa 14 ochko bilan oxirgi o‘rinda qolmoqda.

Italiya. A Seriya. 26-tur
Roma – Monsa – 4:0 (2:0)
Gollar: 1:0 – Salemakers, 10; 2:0 – Shomurodov, 32; 3:0 – Anxelinyo, 73; 4:0 – Kristante, 88.