«Рома» Римдаги «Олимпико» стадионида А Сериясининг 26-тур доирасида жорий мавсумнинг аутсайдерларидан бири – «Монца»ни қабул қилди. Учрашувга неаполлик ҳакам Фабио Мареска бошчилик қилди. Уй жамоаси ишончли ғалабага эришди – 4:0.  

«Рома»нинг асосий таркибидан майдонга тушган ўзбекистонлик ҳужумчи Элдор Шомуродов 10-дақиқада Алексис Салемакерсга голли узатма берди. 32-дақиқада эса унинг ўзи рақиб дарвозасини ишғол қилди. 73-дақиқада испаниялик Анхелиньо ҳисобни йирик кўринишга келтирди, 88-дақиқада эса ярим ҳимоячи Бриан Кристанте якуний натижани белгилади. Шомуродов мазкур ўйинда 70-дақиқада захирага олинди.

Ушбу ғалаба «Рома»га мавсумдаги очколар сонини 40га етказиш имконини берди. 26-тур якунларига кўра, римликлар турнир жадвалида 9-ўринни эгаллаб турибди. «Монца» эса 14 очко билан охирги ўринда қолмоқда.

Италия. А Серия. 26-тур
Рома – Монца – 4:0 (2:0)
Голлар: 1:0 – Салемакерс, 10; 2:0 – Шомуродов, 32; 3:0 – Анхелиньо, 73; 4:0 – Кристанте, 88.