"Real Madrid" yozgi transfer oynasi uchun rejalar tuzmoqda.
Relevo nashri ma’lum qilishcha, Madrid klubi yozgi mavsumni deyarli hech qanday transfersiz o‘tkazishni rejalashtirgan. "Qaymoqranglilar" faqatgina "Liverpul"dan o‘ng qanot himoyachisi Trent Aleksander-Arnoldni qo‘lga kiritishga qiziqmoqda.
Madrid klubi yulduzlarni erkin agent sifatida o‘z safiga qo‘shib olish strategiyasini davom ettirmoqchi. O‘tgan yili Kilian Mbappe bilan shunday bo‘lgan edi va Trent bilan hozir ham shunday bo‘lishi rejalashtirilgan. Masalan, Vinisius Junior yoki Karlo Anchelottining ketishi kabi fors-major holatlar bo‘lmasa, "Real Madrid"ning transfer oynasi tinch bo‘ladi.
"Real Madrid" himoya markazidagi muammo yosh Raul Asensioning muvaffaqiyati tufayli hal bo‘ldi va bu boshqa yosh himoyachilarga o‘rnak bo‘ladi, deb hisoblaydi. Qayd etilishicha, Luka Modrich katta ehtimol bilan yana bir mavsum qoladi, Dani Sebalyos shartnomasini uzaytirish tarafdori, Aureliyen Tchuameni yuqori sifatli o‘yini Martin Subimendiga bo‘lgan qiziqishga nuqta qo‘ygan.
