"Paxtakor" Elit Osiyo chempionlar ligasining nimchorak final bosqichi doirasida o‘z maydonida Saudiya Arabistonining "Al-Hilol" klubini qabul qilib, kichik hisobda g‘alaba qozondi.

Uchrashuvning boshidanoq mezbonlar faol harakat qilib, bir necha xavfli hujumlar uyushtirishdi.  

Flamarionning 29-daqiqada kiritgan goli uchrashuvdagi yagona to‘p bo‘ldi. Uning goliga Riaskos ajoyib uzatma bilan yordam berdi.

Oradan 2 daqiqa o‘tib, Alijonov jarima maydonchasida raqiblarni dog‘da qoldirib, chap oyog‘i bilan uzoq burchakni nishonga olishga harakat qildi, "Al Hilol" posboni bir amallab to‘pni qaytarib qoldi.

"Paxtakor" tanaffusga qadar himoyada qattiq turib, raqibga imkon qoldirmadi. Jonatan darvoza ustunida ishonchli harakat qildi va bir necha bor jamoasini qutqarib qoldi.  

O‘yinning 70-daqiqasida toshkentliklar ikkinchi golni urishga yaqin kelishdi. Alijonovning uzatmasidan so‘ng Xolmatov darvozabon bilan yakkama-yakka vaziyatga chiqdi va dastlab oyoq bilan to‘pga zarba berdi, posbon uni qaytarganidan so‘ng bosh bilan ham urinib ko‘rdi, ammo bu safar ham to‘p darvozaga kirmadi — himoyachi to‘pni tepb yuborishga ulgurdi.

Ikkinchi bo‘limda "Al-Hilol" gol urishga harakat qilgan bo‘lsa-da, "Paxtakor"ning tashkillangan himoyasi ularga javob qaytarishga imkon bermadi. 90+8 daqiqada o‘yin yakunlandi va "Paxtakor" 1:0 hisobida g‘alaba qozondi!  

Javob o‘yini bir haftadan so‘ng "Al-Hilol" maydonida o‘tkaziladi.

Elit OCHL, nimchorak final
PAXTAKOR" - "Al Hilol" 1:0
Gol: Flamarion 29.
"Paxtakor": Jonatan, Alijonov, Azmiddinov, Abdullayev, Adhamzoda, Bo‘riyev, Lukka, Xolmatov, Hamdamov, Flamarion, Riaskos.
Zaxira: Shevchenko, Nazarov, Hamraliyev, Ibragimov, Ortiqboyev, Jo‘raqo‘ziyev, Sergeev, Mahammadjonov, Resan, Abdumajidov, Saitov, Hoshimov.
"Al Hilol": Bunu, Nosir Davsari, Bulayhi, Kulibali, Xalifa Davsari, Nevesh, Milinkovich-Savich, Kayo Sezar, Malkom, Salim Davsari, Leonardo.
Zaxira: Alyami, Ovays, G‘annam, Qahtani, Harbi, Kanno, Muhaysh, Turki, Hadhud, Hamddan.