O‘zbekiston o‘smirlar terma jamoasi ilk bor U-18 Jahon chempionatining III divizion «B» guruhida qatnashmoqda va Tailandda o‘tayotgan ushbu musobaqada juda muvaffaqiyatli ishtirok etmoqda.

O‘smirlarimiz Janubiy Afrika Respublikasi (12:0), Lyuksemburg (12:1), Turkmaniston (8:2) va Bosniya va Gersegovinani (11:3) yirik hisoblarda mag‘lubiyatga uchratdi. 12 ochko va 43-6 gollari farqi bilan O‘zbekiston turnir jadvalida ishonchli tarzda vaqtinchalik 1-o‘rinni egallab turibdi.

Biroq, to‘rt g‘alabaga ega yana bir jamoa bor – Tailand terma jamoasi. Ular bizdan faqatgina gollar farqi bo‘yicha ortda qolmoqda. O‘zbekiston aynan mezbon jamoa bilan oltin medallar va III divizion «A» guruhiga yo‘llanmani qo‘lga kiritish uchun bahs olib boradi.

Uchrashuv 6 mart kuni Toshkent vaqti bilan soat 18:00 da boshlanadi. Bizni har qanday g‘alaba qoniqtiradi – xoh asosiy vaqtda bo‘lsin, xoh qo‘shimcha daqiqalarda.

Tailand terma jamoasi bilan avval ham to‘qnash kelganmiz. 2024 yil aprel oyida Toshkent va Samarqandda o‘tkazilgan Osiyo va Okeaniya kubogida yoshlarimiz chempionlikni qo‘lga kiritgan. O‘shanda guruh bosqichida tailandliklarni 7:5 hisobida mag‘lub etgan bo‘lsak, finalda 2:1 hisobida g‘alaba qozongan edik.

O‘zbekiston terma jamoasi yetakchisi – jamoa sardori Jasurbek Rustamxonov turnirda porlamoqda. Uning hisobida allaqachon 20 (12 gol + 8 golli uzatma) ochko mavjud. Jasur va yosh yulduz Salohiddin Azimov o‘tgan mavsumni Chexiyada o‘tkazgan. Qolgan o‘yinchilarimiz esa Qozog‘istonning yoshlar ligasida "Toshkent Selekt" jamoasi safida o‘ynagan edi.

Xokkey sporti mamlakatimizda bor-yo‘g‘i 7 yil avval rivojlana boshlagan bo‘lsada, yosh o‘yinchilarimiz xalqaro maydonda O‘zbekiston xokkeyining jadal o‘sish darajasini ishonch bilan namoyish etmoqda. Ularga faqatgina omad va g‘alaba tilaymiz!