«Andijon» «Mavsum-2025»ni safarda «Qo‘qon-1912»ga qarshi o‘yin boshlaganidan va unda kuchlar teng kelganidan xabaringiz bor.

«Burgutlar»ning bu yilgi chempionatda dastlabki goli muallifi Rustam Turdimurodov bo‘ldi.

Hujumchi birinchi uchrashuvdan keyin klub matbuot xizmatiga intervyu berdi.

— Rustamjon, chempionatning dastlabki o‘yini borasida nima deya olasiz?
— O‘yin kutganimizdek o‘tdi. 1-tur bo‘lgani uchun hammada hayajon bo‘ldi. Qolaversa, vodiy derbisi. Mavsumni yaxshi boshladik, deb o‘ylayman.

— «Andijon»ning 2025 yildagi ilk goli muallifi bo‘ldingiz va tarixdan joy oldingiz. Buni kutganmidingiz?
— To‘g‘risi, xayolimda faqat gol urish va g‘alaba qozonish edi. «Andijon»ning mavsumdagi ilk goli, tarixda qolish xayolimga ham kelmagan edi. Bor e’tiborim g‘alaba va unga hissamni qo‘shish edi.

— Golingizga qanday ta’rif berasiz?
— Xudoga shukr, mavsumni gol bilan boshladim. Bundan tashqari, jamoaga va o‘zimga ishonch ortishi uchun kerakli gol edi.

— G‘alaba uchun nima yetishmadi?
— Bizda g‘alaba uchun deyarli barchasi bor edi. Hujumlarni yakunlashda biroz shoshdik, deb o‘ylayman.

— O‘yin durangga mos bo‘ldi, deb o‘ylaysizmi?
— Menimcha, jangovar durangga mos.

— Keyingi turda «Nasaf»ni qabul qilamiz. Andijonda ochilish o‘yini. Nima kutyapsiz?
— Har doimgidek muxlislarimiz stadionni «yondirib» berishini va uyimizda 3 ochko olishimizni kutyapman.

— Bu yil 7-raqamni tanladingiz. Bu nima bilan bog‘liq?
— Ronaldo 18 yoshida 7-raqamda o‘ynagan va mas’uliyatni his qilgan. O‘tgan mavsumdanda ko‘proq mas’uliyatliroq bo‘lish uchun tanladim.