Portugaliya terma jamoasi bosh murabbiyi Roberto Martines Krishtianu Ronaldu 40 yoshida ham mamlakatning bosh jamoasi safida o‘ynashni davom ettirayotgani sababi haqida gapirdi.

Martines The Coaches Voise nashriga bergan intervyusida shunday dedi:

"Ronaldu haqida gap ketganda, men uni uchta asosiy omil asosida baholayman. Birinchisi – uning iste’dodi: shubhasiz u futbol tarixidagi eng buyuk o‘yinchilardan biri. Ikkinchisi – tajribasi: u Yevropa chempionatida olti marta o‘ynagan yagona futbolchi va 200 dan ortiq xalqaro o‘yinda ishtirok etgan. Ammo uning eng katta fazilati – fidoyiligi. Krishtianuning Portugaliya sharafini himoya qilishga bo‘lgan ishtiyoqi butun jamoani ilhomlantiradi. Ronaldu milliy jamoada avvalgi xizmatlari uchun emas, hozirgi holati sabab o‘ynayapti: jamoa so‘nggi ikki yilda 21 o‘yin o‘tkazgan bo‘lsa, u 17 ta gol urdi".

Martines Portugaliya terma jamoasining asosiy maqsadi haqida ham gapirdi.

"Portugaliya bilan asosiy orzumiz – hali yutmagan yagona sovrinimiz, Jahon chempionatida g‘olib bo‘lish. Bosimdan qochish emas, balki uni qabul qilish va o‘yinimizni namoyon etish muhim", deydi Martines.

Ronaldu 2003 yildan beri Portugaliya terma jamoasi sharafini himoya qilib keladi. U milliy jamoa safida 217 o‘yin o‘tkazib, 135 ta gol urgan. Hujumchi bu ko‘rsatkich bo‘yicha xalqaro futbol tarixidagi eng yaxshi to‘purar hisoblanadi.

Ma’lumot uchun, Portugaliya terma jamoasi 21 mart kuni UYEFA Millatlar Ligasi chorak final doirasida Daniyaga qarshi o‘yin o‘tkazadi.