Superliganing ilk turidanoq o‘z ishiga mas’uliyatsizlik bilan yondashgan klublar mavjud. Liga komissarlari 2 ta bellashuv bo‘yicha bir qator qaydlar keltirgan.

Jumladan, uchrashuvlarning birida mezbon klub “Superliga va Proliga reglamenti”ning 15.14-bandiga amal qilmagan. Ya’ni, to‘p uzatib beruvchi bolalar 100 daqiqaga yaqin davom etadigan o‘yinni o‘tirib tomosha qilishi uchun stullar taqdim etilmagan. Liga bu kabi holatni yoqlamaydi va klublarni o‘z xodimlariga, ayniqsa, bolalarga e’tiborli bo‘lishga chaqiradi.

Shuningdek, respublikaning eng oldi klublaridan biri ilk tur uchrashuvini tashkil etishda qator kamchiliklarga yo‘l qo‘ygan. Klub mavsum startiga umuman tayyor bo‘lmagan. Oqibatda, klub bajarishi lozim bo‘lgan qator masalalar Liga mutaxassislari tomonidan hal etilgan:

— rasmiy uchrashuv uchun Liga tomonidan taqdim etilgan to‘plar olib chiqilmagan;

— texnik zonada talab etilgan beyjiksiz qator shaxslar harakat qilgan;

— U21 jamoasi ishtirokidagi o‘yinda darvozaga juda eski to‘r ilingan bo‘lib, unda futbol to‘pi bemalol o‘tib ketishi mumkin bo‘lgan teshiklar mavjud bo‘lgan, to‘rdagi teshikni yo‘qotish uchun uni darvozaga qayta bog‘lashga to‘g‘ri kelgan va uchrashuv belgilangan vaqtdan kech start olgan.

Liga uchun bu kabi holatlarni alohida ochiqlash og‘ir. Ammo klublar o‘z ishini professional tarzda yo‘lga qo‘yishi Liga uchun muhim.

Ma’lumot uchun, joriy mavsumning dastlabki ikki turida Liga kamchilikka yo‘l qo‘ygan klublar nomini ochiqlamaydi, biroq ularga nisbatan chora ko‘radi. Superliga 3-turidan boshlab esa o‘yin tashkil etishda yo‘l qo‘yilgan har qanday kamchilik ochiqlanadi. Afsuski, ayrim holatlarda klublar to‘layotgan jarima vaziyatni o‘zgartirmayapti. Jarimaga sabab bo‘lgan holat o‘rganilib, shu vazifa uchun mas’ul bo‘lgan shaxslarga nisbatan chora ko‘rilayotgani bo‘yicha ham Ligada ma’lumotlar mavjud emas.