Суперлиганинг илк туриданоқ ўз ишига масъулиятсизлик билан ёндашган клублар мавжуд. Лига комиссарлари 2 та беллашув бўйича бир қатор қайдлар келтирган.

Жумладан, учрашувларнинг бирида мезбон клуб “Суперлига ва Пролига регламенти”нинг 15.14-бандига амал қилмаган. Яъни, тўп узатиб берувчи болалар 100 дақиқага яқин давом этадиган ўйинни ўтириб томоша қилиши учун стуллар тақдим этилмаган. Лига бу каби ҳолатни ёқламайди ва клубларни ўз ходимларига, айниқса, болаларга эътиборли бўлишга чақиради.

Шунингдек, республиканинг энг олди клубларидан бири илк тур учрашувини ташкил этишда қатор камчиликларга йўл қўйган. Клуб мавсум стартига умуман тайёр бўлмаган. Оқибатда, клуб бажариши лозим бўлган қатор масалалар Лига мутахассислари томонидан ҳал этилган:

— расмий учрашув учун Лига томонидан тақдим этилган тўплар олиб чиқилмаган;

— техник зонада талаб этилган бейжиксиз қатор шахслар ҳаракат қилган;

— U21 жамоаси иштирокидаги ўйинда дарвозага жуда эски тўр илинган бўлиб, унда футбол тўпи бемалол ўтиб кетиши мумкин бўлган тешиклар мавжуд бўлган, тўрдаги тешикни йўқотиш учун уни дарвозага қайта боғлашга тўғри келган ва учрашув белгиланган вақтдан кеч старт олган.

Лига учун бу каби ҳолатларни алоҳида очиқлаш оғир. Аммо клублар ўз ишини профессионал тарзда йўлга қўйиши Лига учун муҳим.

Маълумот учун, жорий мавсумнинг дастлабки икки турида Лига камчиликка йўл қўйган клублар номини очиқламайди, бироқ уларга нисбатан чора кўради. Суперлига 3-туридан бошлаб эса ўйин ташкил этишда йўл қўйилган ҳар қандай камчилик очиқланади. Афсуски, айрим ҳолатларда клублар тўлаётган жарима вазиятни ўзгартирмаяпти. Жаримага сабаб бўлган ҳолат ўрганилиб, шу вазифа учун масъул бўлган шахсларга нисбатан чора кўрилаётгани бўйича ҳам Лигада маълумотлар мавжуд эмас.