O‘zbekiston milliy terma jamoasi a’zosi Odiljon Hamrobekov Qirg‘iz Respublikasi bilan uchrashuv oldidan matbuot anjumanida ishtirok etdi.

— Avvalo, futbolchilar nomidan janob Srechko Katanesga uch yarim yillik faoliyati uchun minnatdorlik bildirmoqchiman. Unga sog‘lik tilaymiz. Ertangi uchrashuvning naqadar muhimligini barchamiz his qilyapmiz. Jamoa sifatida birdamlikda harakat qilib, oldimizga qo‘yilgan vazifani uddalashimiz kerak. Bunga butun jamoa bilan puxta tayyorgarlik ko‘rdik.

Maydonda nom emas, futbolchilar harakat qiladi. Agar raqibni mensimasak, bu bizning eng katta xatomiz bo‘ladi. Istaklarimiz raqib jamoanikidan yuqori bo‘lsagina, o‘z ustunligimizni namoyon eta olamiz. O‘yinchilarning darajasi ana shunda ko‘rinadi. Qirg‘iz Respublikasini hurmat qilamiz, lekin 90 daqiqa ichida har qanday raqibni mag‘lub etish mumkin. Raqib jamoaning hozirgi holati bizni chalg‘itmasligi kerak.

Muxlislar bilan to‘lgan stadionda futbol o‘ynash mezbon jamoaga har tomonlama yordam beradi, shu bilan birga, futbolchilar zimmasidagi mas’uliyatni ham oshiradi. Ichki chempionatimiz o‘yinlarida maydon holati a’lo darajada edi. O‘ylaymanki, bu biz uchun muammo bo‘lmaydi" - dedi Odiljon Hamrobekov.