Ўзбекистон миллий терма жамоаси аъзоси Одилжон Ҳамробеков Қирғиз Республикаси билан учрашув олдидан матбуот анжуманида иштирок этди.
— Аввало, футболчилар номидан жаноб Сречко Катанецга уч ярим йиллик фаолияти учун миннатдорлик билдирмоқчиман. Унга соғлик тилаймиз. Эртанги учрашувнинг нақадар муҳимлигини барчамиз ҳис қиляпмиз. Жамоа сифатида бирдамликда ҳаракат қилиб, олдимизга қўйилган вазифани уддалашимиз керак. Бунга бутун жамоа билан пухта тайёргарлик кўрдик.
Майдонда ном эмас, футболчилар ҳаракат қилади. Агар рақибни менсимасак, бу бизнинг энг катта хатомиз бўлади. Истакларимиз рақиб жамоаникидан юқори бўлсагина, ўз устунлигимизни намоён эта оламиз. Ўйинчиларнинг даражаси ана шунда кўринади. Қирғиз Республикасини ҳурмат қиламиз, лекин 90 дақиқа ичида ҳар қандай рақибни мағлуб этиш мумкин. Рақиб жамоанинг ҳозирги ҳолати бизни чалғитмаслиги керак.
Мухлислар билан тўлган стадионда футбол ўйнаш мезбон жамоага ҳар томонлама ёрдам беради, шу билан бирга, футболчилар зиммасидаги масъулиятни ҳам оширади. Ички чемпионатимиз ўйинларида майдон ҳолати аъло даражада эди. Ўйлайманки, бу биз учун муаммо бўлмайди" - деди Одилжон Ҳамробеков.
