Jahon chempionati 3-saralash bosqichi doirasidagi O‘zbekiston — Qirg‘iziston uchrashuvi 20 mart, payshanba kuni Toshkentdagi “Bunyodkor” stadionida bo‘lib o‘tadi. Unda jamoa himoyachisi Umarbek Eshmurodov diskvalifikasiya sabab o‘yinni o‘tkazib yuboradi.

Futbolchi jamoaning 6-turdagi Shimoliy Koreyaga qarshi o‘yinda qizil kartochka olgan edi. U uchrashuvning 83-daqiqasida raqib hujumchisiga qo‘pol harakat qilgani uchun maydondan chetlatilgan.

Avvalroq Husniddin Aliqulov ham Turkiya chempionatidagi “Rizespor” — “Bodrum” uchrashuvida jarohat olib, terma jamoaning martdagi yig‘inini o‘tkazib yuborishi aniq bo‘lgan edi.

Shuningdek, o‘yin oldidan o‘tkazilgan matbuot anjumanida Temur Kapadze Oston O‘runov o‘zini yomon his qilgani uchun uning o‘rniga Hojimat Erkinov tarkibga jalb etilgani haqida aytdi.

O‘zbekiston terma jamoasi 6-turdan keyin A guruhida 13 ochko bilan 2-o‘rinni egallab turibdi. Qirg‘iziston 3 ochko bilan 5-o‘rinni band etgan.

Eslatib o‘tamiz, O‘zbekiston — Qirg‘iziston bahsi bugun, 20 mart kuni 21:00 da boshlanadi.