Roberto Martines Portugaliya terma jamoasi va "PSJ"dagi Joau Nevesh va Vitinya juftligini yuqori baholadi.

Portugaliyalik murabbiy Daniyaga qarshi Millatlar ligasi 1/4 finali 1-o‘yini arafasida o‘z fikrlarini bildirib o‘tdi.

"Menga "PSJ" va futbolchilarimizning o‘yini yoqdi, ammo Nevesh va Vitinya dueti terma jamoada paydo bo‘lganini unutmasligimiz kerak.

Men Daniya terma jamoasini yaxshi bilaman, ular bilan so‘nggi yillarda uchrashganmiz. Daniyaliklarda yangi murabbiy bor, ammo tushunchalar avvalgilariga o‘xshash. Ularning maydonda nima qilmoqchi ekanligini tushunish oson, menga ularning yondashuvi va uslubi yoqadi. Biz jamoani yaxshi muvozanatlashimiz, shiddatli, eng yuqori saviyada o‘ynashimiz kerak.

Millatlar ligasi eng qiyin turnirlardan biriga aylanib bormoqda. Bu nafaqat yakuniy bosqich, balki saralash haqida ham. Jamoalarning saviyasini ko‘rib turibsiz, endi bu Yevropaning eng yaxshi jamoalari bilan o‘yinlar", - dedi Martines.