Ispaniya terma jamoasi bosh murabbiyi Luis de la Fuente UYEFA Millatlar ligasi chorak finalining Niderlandiya terma jamoasiga qarshi safardagi ilk uchrashuvidan so‘ng (2:2) o‘yin davomida jamoasi sezilarli ustunlikka erishishi mumkinligini ta’kidladi.
"Morataning boshi bilan zarbasidan keyin imkoniyat paydo bo‘ldi, biz ikkita gol urishimiz mumkin edi. Ammo ba’zida biz vaziyatni nazorat qila olamiz, ba’zida esa qila olmaymiz. Bu qiyin pley-off va Valensiyada biz uchun oson bo‘lmaydi" - dedi de la Fuente o‘yindan keyingi matbuot anjumanida.
Niderlandiya – Ispaniya uchrashuvining 9-daqiqasida mehmonlar yarim himoyachisi Niko Uilyams hisobni ochdi. 28-daqiqada Kodi Gakpo, 46-daqiqada Teyani Reyndars "apelsinlar"ni hisobda oldinga olib chiqishdi. Mezbonlar himoyachisi Yorrel Xato chetlatilganidan so‘ng, ispanlar 90+3-daqiqada Mikel Merinoning goli evaziga hisobni tenglashtirishga muvaffaq bo‘lishdi. Javob o‘yini 23 mart kuni Valensiyada bo‘lib o‘tadi.
