Kevin De Bryuynening agenti "San-Diyego" rahbariyati bilan ehtimoliy transfer haqida gaplashdi.
"Manchester Siti"ning 33 yoshli yarim himoyachisi yozda erkin agentga aylanishi mumkin. Futbolchining "shaharliklar" bilan shartnomasini uzaytirmasligi ehtimoli yuqori.
Saudiya Arabistonining bir qator klublari De Bryuynega qiziqish bildirishgan, biroq futbolchining o‘zi MLSga o‘tishni afzal ko‘rmoqda. "San-Diyego"ning sport direktori klub belgiyalik futbolchining agenti bilan muzokaralar olib borganini, biroq futbolchining maosh talabi yuqori bo‘lgani uchun kelishuvni amalga oshirish qiyin bo‘lishini aytdi.
"Bu mish-mishlar... Men ular qayerdan kelganini bilmayman. Men uning agenti bilan gaplashdim, lekin agent ko‘plab futbolchilarni ifodalaydi. Har safar bu xabarni ko‘rganimda: "Bularning hammasini siz tarqatyapsizmi?" deyman.
U fantastik futbolchi va bu hududni juda yaxshi ko‘radi. Har yili ta’tilni shu yerda o‘tkazadi, lekin bu mish-mishlar qayerdan kelayotganini bilmayman. Men u bilan gaplashdim, lekin rostini aytaman: uning maoshi hozirda bizning byudjetimizga mos emas" - dedi "San-Diyego" bosh direktori Tayler Xips.
"San-Diyego" MLSning yangi klubi bo‘lib, fevral oyida ilk o‘yinini o‘tkazdi.
