Кевин Де Брюйненинг агенти "Сан-Диего" раҳбарияти билан эҳтимолий трансфер ҳақида гаплашди.
"Манчестер Сити"нинг 33 ёшли ярим ҳимоячиси ёзда эркин агентга айланиши мумкин. Футболчининг "шаҳарликлар" билан шартномасини узайтирмаслиги эҳтимоли юқори.
Саудия Арабистонининг бир қатор клублари Де Брюйнега қизиқиш билдиришган, бироқ футболчининг ўзи МЛСга ўтишни афзал кўрмоқда. "Сан-Диего"нинг спорт директори клуб бельгиялик футболчининг агенти билан музокаралар олиб борганини, бироқ футболчининг маош талаби юқори бўлгани учун келишувни амалга ошириш қийин бўлишини айтди.
"Бу миш-мишлар... Мен улар қаердан келганини билмайман. Мен унинг агенти билан гаплашдим, лекин агент кўплаб футболчиларни ифодалайди. Ҳар сафар бу хабарни кўрганимда: "Буларнинг ҳаммасини сиз тарқатяпсизми?" дейман.
У фантастик футболчи ва бу ҳудудни жуда яхши кўради. Ҳар йили таътилни шу ерда ўтказади, лекин бу миш-мишлар қаердан келаётганини билмайман. Мен у билан гаплашдим, лекин ростини айтаман: унинг маоши ҳозирда бизнинг бюджетимизга мос эмас" - деди "Сан-Диего" бош директори Тайлер Хипс.
"Сан-Диего" МЛСнинг янги клуби бўлиб, февраль ойида илк ўйинини ўтказди.
