O‘zbekiston futbol assosiasiyasi va O‘zbekiston futbol hakamlar markazi hamkorligida mamlakatimizda hakamlik tizimini yanada rivojlantirish, yosh hakamlarning bilim va tajribasini oshirish hamda ularning professional o‘sishiga ko‘maklashish maqsadida Hakamlar akademiyasi tashkil etilmoqda.

27 mart kuni O‘FA va O‘zFHM rahbariyati ishtirokida akademiya faoliyatiga bag‘ishlangan muhim yig‘ilish bo‘lib o‘tdi. Unda quyidagi asosiy masalalar muhokama qilindi:

— Hududlardagi hakamlarning aniq sonini aniqlash;

— Musobaqalarda yosh va iqtidorli hakamlarni tanlab olish hamda ularni muntazam kuzatib borish;

— O‘zbekistonda erkak va ayol hakamlar sonini oshirish;

— Akademiyada ta’lim oluvchilarni O‘FA va O‘zFHM tomonidan maxsus kiyim-kechak hamda kerakli jihozlar bilan ta’minlash;

— O‘quv jarayonini 6 ta modul asosida tashkil etish belgilab olindi.

Akademiyaga qabul qilish jarayoni aniq mezonlar asosida amalga oshiriladi. Ilk seleksiya bosqichida quyidagi talablar qo‘yiladi:

— Yosh: 18-28 yosh oralig‘ida bo‘lishi;

— Antropometrik ko‘rsatkichlar: erkaklar uchun kamida 170 sm, ayollar uchun kamida 160 sm bo‘lishi;

— Jismoniy tayyorgarlik darajasi;

— Futbol haqidagi tushunchasi va nazariy bilimlari;

— Kompyuter texnologiyalari hamda chet tili, xususan, ingliz tili bo‘yicha bilim darajasi.

Hakamlar akademiyasi yosh va iqtidorli hakamlarning kelajakda yuqori saviyadagi xalqaro o‘yinlarni boshqarish imkoniyatini oshirishga xizmat qiladi. Bu tashabbus mamlakatimiz futbol hakamligi tizimini yanada rivojlantirish va jahon standartlariga moslashtirish yo‘lida muhim qadam bo‘ladi.