«Manchester Siti» FIFA kunlari davomida milliy jamoalari safida jonbozlik ko‘rsatgan ayrim futbolchilarini e’tirof etdi. Klub matbuot xizmatida xalqaro maydonda o‘yin o‘tkazgan «shaharlik» charm to‘p ustalari haqida maqola e’lon qilindi. Unda hamyurtimiz Abduqodir Husanov hamda O‘zbekiston milliy jamoasi haqida ham iliq fikrlar bildirilgan.
«Norvegiyaning saralash bosqichidagi ishtiroki endigina boshlanmoqda, ammo ular Vengriyada Isroil ustidan 4:2 hisobida g‘alaba qozondi. Xoland urgan gol norveglarning g‘alabasini yanada mustahkamladi. Erlingning ishonchli o‘yini muvaffaqiyatga katta hissa qo‘shdi. Ushbu g‘alaba orqali norveglar o‘z guruhlarida birinchi o‘ringa chiqib oldi.
Husanov boshchiligidagi O‘zbekiston milliy jamoasi Eron maydonida 2:2 hisobidagi jangovar durang natijaga erishdi. Ushbu o‘yindagi g‘alaba o‘zbeklarni ilk bor Jahon chempionatiga olib chiqishi mumkin edi, ammo ularda imkoniyat hali ham ancha yuqori.
O‘zbekiston ikki marta hisobda oldinga chiqib oldi. Hojimat Erkinov va Abbosbek Fayzullayevning gollari raqibni sarosimaga soldi. Husanov Tehronda to‘liq o‘yin o‘tkazdi va himoyada ishonchli harakat qildi.
O‘zbekistonning navbatdagi ikki uchrashuvi iyun oyida bo‘lib o‘tadi. Birlashgan Arab Amirliklari bilan bahsdagi durang ularga yo‘llanmani taqdim etishi kutilmoqda.
Marmush boshchiligidagi Misr milliy jamoasi Qohirada Serra-Leoneni 1:0 hisobida mag‘lub etib, Jahon chempionatiga chiqish uchun katta qadam tashladi. Ular ayni paytda birinchi o‘ringa mahkam o‘rnashgan, ikkinchi pog‘onadagi jamoa bilan oradagi farq besh ochkoni tashkil qiladi...» – deyiladi maqolada.
