«Манчестер Сити» ФИФА кунлари давомида миллий жамоалари сафида жонбозлик кўрсатган айрим футболчиларини эътироф этди. Клуб матбуот хизматида халқаро майдонда ўйин ўтказган «шаҳарлик» чарм тўп усталари ҳақида мақола эълон қилинди. Унда ҳамюртимиз Абдуқодир Ҳусанов ҳамда Ўзбекистон миллий жамоаси ҳақида ҳам илиқ фикрлар билдирилган.

«Норвегиянинг саралаш босқичидаги иштироки эндигина бошланмоқда, аммо улар Венгрияда Исроил устидан 4:2 ҳисобида ғалаба қозонди. Холанд урган гол норвегларнинг ғалабасини янада мустаҳкамлади. Эрлингнинг ишончли ўйини муваффақиятга катта ҳисса қўшди. Ушбу ғалаба орқали норвеглар ўз гуруҳларида биринчи ўринга чиқиб олди.

Ҳусанов бошчилигидаги Ўзбекистон миллий жамоаси Эрон майдонида 2:2 ҳисобидаги жанговар дуранг натижага эришди. Ушбу ўйиндаги ғалаба ўзбекларни илк бор Жаҳон чемпионатига олиб чиқиши мумкин эди, аммо уларда имконият ҳали ҳам анча юқори.

Ўзбекистон икки марта ҳисобда олдинга чиқиб олди. Ҳожимат Эркинов ва Аббосбек Файзуллаевнинг голлари рақибни саросимага солди. Ҳусанов Теҳронда тўлиқ ўйин ўтказди ва ҳимояда ишончли ҳаракат қилди.

Ўзбекистоннинг навбатдаги икки учрашуви июнь ойида бўлиб ўтади. Бирлашган Араб Амирликлари билан баҳсдаги дуранг уларга йўлланмани тақдим этиши кутилмоқда.

Мармуш бошчилигидаги Миср миллий жамоаси Қоҳирада Серра-Леонени 1:0 ҳисобида мағлуб этиб, Жаҳон чемпионатига чиқиш учун катта қадам ташлади. Улар айни пайтда биринчи ўринга мустаҳкам ўрнашган, иккинчи поғонадаги жамоа билан орадаги фарқ беш очкони ташкил қилади...» – дейилади мақолада.