"Inter Mayami" bosh murabbiyi Xavyer Maskerano MLS doirasidagi "Filadelfiya Yunion"ga (2:1) qarshi o‘yindan keyin Lionel Messi haqidagi savolga javob qaytardi.

Jarohat tufayli 37 yoshli forvard 55-daqiqada maydonga tushdi. Bu uning g‘alaba to‘pi muallifi bo‘lishiga to‘sqinlik qilmadi - u zaxiradan maydonga tushganidan ikki daqiqa o‘tib gol urdi.

"Ha, biz Messining 30-35 daqiqa o‘ynashini xohlagandik. U o‘zini juda yaxshi his qilardi, lekin biz uni asosiy tarkibga kiritib, tavakkal qilmoqchi emasdik. Hammasi ajoyib yakunlandi, biz juda xursandmiz," - dedi Maskerano matbuot anjumanida.