Saudiya Arabistonida 17 yoshgacha bo‘lgan futbolchilar o‘rtasida Osiyo chempionati start oldi. Musobaqaning ochilish o‘yinida "A" guruhidan o‘rin olgan O‘zbekiston va Tailand terma jamoalari maydonga chiqishdi.

Islom Ismoilov shogirdlari 2-daqiqadayoq hisobni ochishga muvaffaq bo‘lishdi. Sadriddin Hasanov 12 metrlardan aniq zarba berib, darvozani ishg‘ol qildi. Oradan 10 daqiqa o‘tib o‘smirlarimiz ikkinchi golni urishdi. Nurbek Sarsenbayev yaqin masofadan bo‘sh qolgan darvozaga to‘pni joyladi. Har ikkala golga Sayfiddin Sodiqov assistentlik qildi.

Birinchi bo‘lim tugashiga 5 daqiqa qolganida tailandlik Silva Mekses individual mahorati evaziga bitta javob to‘pini kiritdi.

56-daqiqada esa Phurinat Pulkamlang qizil kartochka olib, maydonni tark etdi. Qolgan daqiqalarda jamoamiz raqib darvozasiga yana ikki marta yo‘l topdi. O‘yin tugashiga 10 daqiqa qolganida Asilbek Aliyev raqib posboni bilan yakkama-yakka vaziyatga chiqdi va imkoniyatdan unumli foydalangan bo‘lsa, oradan 5 daqiqa o‘tib Abubakir Shukurullayev olis masofadan zarba berib, Tailand posbonini dog‘da qoldirdi.

Shu tariqa, O‘zbekiston U17 terma jamoasi Osiyo kubogi yirik hisobdagi g‘alaba bilan boshladi. Jamoamiz 6 aprel kuni Xitoyga qarshi maydonga chiqadi.

U17 Osiyo kubogi, "A" guruhi, 1-tur
O‘ZBEKISTON - TAILAND - 4:1
Gollar: Sadriddin Hasanov (2), Nurbek Sarsenbayev (12), Asilbek Aliyev (80), Abubakir Shukurullayev (85) — Silva Mekses (40)
Chetlatish: Phurinat Pulkamlang (56)