"Portu"dan ijaraga olingan "Yuventus" futbolchisi Fransishku Konseysau faoliyatini Angliya Premyer-ligasida davom ettirishi mumkin.

Dastlab, "keksa sinyora" rahbarlari portugaliyalikni sotib olishni rejalashtirgan, bu mavsum davomida bir necha bor xabar qilingan, ammo Tiago Motta ishdan bo‘shatilgandan so‘ng transfer ehtimoli keskin kamaydi. Jurnalist Nikolo Skiraning so‘zlariga ko‘ra, Konseysau kelasi yozda vaziyatni o‘zgartirishi mumkin. Futbolchiga Angliyada talab bor: Premyer-liganing nomi oshkor etilmagan bir nechta klublari allaqachon ehtimoliy bitim haqida ma’lumot so‘ragan.

Fransishku Konseysau "Yuventus" safida 31 ta o‘yinda 5 ta gol va 5 ta golli uzatmaga mualliflik qilgan. Transfermarkt portali 22 yoshli vingerning narxini 36 mln yevroga baholagan.