Chap qanot himoyachisi Ferlan Mendi va yarim himoyachi Dani Sebalyos "Real"ga Chempionlar Ligasi 1/4 finalidan o‘rin olgan Londonning "Arsenal" klubiga qarshi javob uchrashuvida yordam bermaydi.
Seshanba kuni "qaymoqranglilar" birinchi o‘yinda "kanonirlar"ga yirik hisobda yutqazdi (0:3). Dastlab, fransuz va ispaniyalik futbolchi Madriddagi o‘yingacha jarohatlarini tuzatishga ulgurishi taxmin qilingan edi, ammo endi bunday ssenariy deyarli istisno qilingan, deb yozadi Diario AS. Eslatib o‘tamiz, "Arsenal"ga qarshi "Santyago Bernabeu"dagi bahs kelasi chorshanba, 16 aprel kuni bo‘lib o‘tadi.
Ferlan Mendi mart oyining o‘rtalaridan, Dani Sebalyos esa fevral oyining oxiridan buyon maydonga tushmayapti.













