Myunxenning "Bavariya" klubi va Germaniya terma jamoasining sobiq darvozaboni Oliver Kan moliyaviy muammolar tufayli 2024 yil yozida Fransiya chempionatining to‘rtinchi divizioniga tushirilgan Fransiyaning "Bordo" klubini sotib olish bo‘yicha rasmiy taklif yubordi. Bu haqda Germaniyaning Bild portaliga tayanib, Fransiyaning L'Equipe nashri xabar berdi.
Manbaga ko‘ra, Kan klubni sotib olgani uchun 30 mln yevro miqdorida tovon puli to‘laydi. Qayd etilishicha, zarur summa mavjud bo‘lsa-da, bitim hali yakunlanmagan. Shuningdek, Kan yaqin yillarda fransuz klubini Liga 1ga qaytarish niyatida ekanini ma’lum qilgan.
Bordo shahrining shu nomdagi "Bordo" klubi bungacha olti karra Fransiya chempioni, to‘rt karra Kubok g‘olibi va uch karra mamlakat Superkubogi sohibi bo‘lgan.













