Мюнхеннинг "Бавария" клуби ва Германия терма жамоасининг собиқ дарвозабони Оливер Кан молиявий муаммолар туфайли 2024 йил ёзида Франция чемпионатининг тўртинчи дивизионига туширилган Франциянинг "Бордо" клубини сотиб олиш бўйича расмий таклиф юборди. Бу ҳақда Германиянинг Bild порталига таяниб, Франциянинг L'Equipe нашри хабар берди.

Манбага кўра, Кан клубни сотиб олгани учун 30 млн евро миқдорида товон пули тўлайди. Қайд этилишича, зарур сумма мавжуд бўлса-да, битим ҳали якунланмаган. Шунингдек, Кан яқин йилларда француз клубини Лига 1га қайтариш ниятида эканини маълум қилган.

Бордо шаҳрининг шу номдаги "Бордо" клуби бунгача олти карра Франция чемпиони, тўрт карра Кубок ғолиби ва уч карра мамлакат Суперкубоги соҳиби бўлган.