"Andijon"ning "Paxtakor"ga qarshi tarixiy g‘alabasidan so‘ng klub bosh direktori Elbek Samatov jurnalistlarning ayrim savollariga javob qaytardi.
- Ajoyib g‘alaba bilan tabriklaymiz. Hissiyotlar qanday?
- Avvalambor, barcha muxlislarimizni, Andijon xalqimizni tarixiy g‘alaba bilan tabriklayman. 26 yil deganda Toshkentda “Paxtakor” ustidan g‘alaba qozondik. Har qanday tarix albatta bir kun kelib yangilanadi. O‘tgan yili Kubokni oldik, yangi tarix yaratdik. Bugun ham o‘yindan oldin kiyinish xonasiga kirib futbolchilarga “har qanday tarix bir kun yangilanadi, biz emas, aksincha raqib bizdan qo‘rqishi kerak, boringlarni beringlar”, deb aytdim. Yana bir narsani aytishim mumkinki, yigitlar zo‘r o‘ynashdi, muxlislar ham zo‘r qo‘llab-quvvatlashdi, hammaga rahmat. Asosiysi, bosh murabbiymizga alohida minnatdorchilik bildirmoqchiman. Chunki, 1-daqiqadan 90-daqiqagacha murabbiyning imzosi ko‘rindi.
- “Andijon” bu yil OCHLda qatnashadi va O‘zbekistonning bayroqdori hisoblanadi. Bu musobaqaga tayyorgarlik qanday ketyapti, ikkinchi davraga kelib qanaqa o‘zgarishlar bo‘ladi?
- Osiyo Chempionlar ligasiga tayyorgarligimiz yil boshidan boshlangan. Qaysidir ma’noda tarkibimizni OCHLni hisobga olib yig‘ganmiz. Nimagaki, biz bu yerda nafaqat Andijon, balki butun O‘zbekiston sha’nini himoya qilamiz. Bu o‘ziga yarasha mas’uliyat talab qiladi. Yozda bir-ikkita pozisiyalarni o‘zgartirishimiz mumkin. Biroq bunga hali erta. O‘yinlar davomida murabbiylar shtabi bilan gaplashgan holatda ko‘rib chiqamiz.
- Bugun muxlislar stadionni “yondirdi”...
- Ishqibozlarimizga katta rahmat. Andijondan uzoq yo‘l bosib kelishgani uchun minnatdormiz. Ularning olqishlashi evaziga jamoamiz xuddi o‘z uyida o‘ynadi, deb aysak bo‘ladi" - dedi Samatov.
