"Андижон"нинг "Пахтакор"га қарши тарихий ғалабасидан сўнг клуб бош директори Элбек Саматов журналистларнинг айрим саволларига жавоб қайтарди.
- Ажойиб ғалаба билан табриклаймиз. Ҳиссиётлар қандай?
- Авваламбор, барча мухлисларимизни, Андижон халқимизни тарихий ғалаба билан табриклайман. 26 йил деганда Тошкентда “Пахтакор” устидан ғалаба қозондик. Ҳар қандай тарих албатта бир кун келиб янгиланади. Ўтган йили Кубокни олдик, янги тарих яратдик. Бугун ҳам ўйиндан олдин кийиниш хонасига кириб футболчиларга “ҳар қандай тарих бир кун янгиланади, биз эмас, аксинча рақиб биздан қўрқиши керак, борингларни беринглар”, деб айтдим. Яна бир нарсани айтишим мумкинки, йигитлар зўр ўйнашди, мухлислар ҳам зўр қўллаб-қувватлашди, ҳаммага раҳмат. Асосийси, бош мураббиймизга алоҳида миннатдорчилик билдирмоқчиман. Чунки, 1-дақиқадан 90-дақиқагача мураббийнинг имзоси кўринди.
- “Андижон” бу йил ОЧЛда қатнашади ва Ўзбекистоннинг байроқдори ҳисобланади. Бу мусобақага тайёргарлик қандай кетяпти, иккинчи даврага келиб қанақа ўзгаришлар бўлади?
- Осиё Чемпионлар лигасига тайёргарлигимиз йил бошидан бошланган. Қайсидир маънода таркибимизни ОЧЛни ҳисобга олиб йиғганмиз. Нимагаки, биз бу ерда нафақат Андижон, балки бутун Ўзбекистон шаънини ҳимоя қиламиз. Бу ўзига яраша масъулият талаб қилади. Ёзда бир-иккита позицияларни ўзгартиришимиз мумкин. Бироқ бунга ҳали эрта. Ўйинлар давомида мураббийлар штаби билан гаплашган ҳолатда кўриб чиқамиз.
- Бугун мухлислар стадионни “ёндирди”...
- Ишқибозларимизга катта раҳмат. Андижондан узоқ йўл босиб келишгани учун миннатдормиз. Уларнинг олқишлаши эвазига жамоамиз худди ўз уйида ўйнади, деб айцак бўлади" - деди Саматов.
