Toshkentning "Lokomotiv" klubi bosh murabbiyi Grigoriy Kolosovskiy Pro liga doirasida "Jayxun" jamoasi ustidan qozonilgan g‘alaba haqida fikr bildirdi.

"Katta hududiy ustunlikka ega bo‘ldik. Bu o‘yinda ham golga tortadigan ko‘plab vaziyatlar yaratdik. Muammo yana o‘sha-o‘sha: vaziyatlardan foydalanish qiyin bo‘lmoqda. Biroq bugungi o‘yinda reja qilingan ko‘plab ishlarimiz o‘xshadi. Raqiblar yosh futbolchilar harakat qilishdi, pressing qilishdi, murabbiyi boshqarib turdi, qaysidir vaziyatlarda bizga muammolar yaratib turdi. Biz bundan osonlik bilan chiqib keta oldik. Jarimadan ustun poylangan vaziyatdan tashqari ularda boshqa vaziyat bo‘lgani yo‘q. Raqibni yaxshi o‘rganib chiqqandik, nimalarga qodirligini bilardik. Shunda ham o‘sha xatolarga yo‘l qo‘ydik. O‘sha vaziyatda tartibliroq harakat qilishimiz kerak edi. Jarimalarga tayyor bo‘lishimiz kerak bo‘lgandi. Xa, to‘rtta gol urgan bo‘lsak ham ko‘prog‘ini istagandik. Doim ham biz istagandek bo‘lmas ekan.

- Raqiblar haqida nima deya olasiz?

- "Jayxun" - yosh jamoa. Ular yaxshi harakat qilishmoqda, murabbiyning faoliyati ko‘rinyapti. Jamoa yomon emas.

- 3 kundan keyin "Lokomotiv"ni Buxoroda kubok o‘yini kutib turibdi.

- Hozir eng asosiysi tezroq tiklanib olib, yaxshi holatda yetib borish kerak. Barchasi shu o‘yinda hal bo‘ladi. Yaxshi natija qayd etishga harakat qilamiz. Biz ham yosh bola emasmiz, qo‘limizdan kelganini qilamiz" - dedi Kolosovskiy.