O‘zbekiston futbol assosiasiyasi birinchi vise-prezidenti Ravshan Ermatov 17 yoshlilar o‘rtasida Osiyo chempioni bo‘lgan o‘smirlar terma jamoasi murabbiy va futbolchilari hamda ota-onalar bilan uchrashdi.

Ravshan Ermatov futbolchilarga avvalgi davrda natija ko‘rsatgan futbolchilarni eslatib, hozir yulduzlik kasaliga duchor bo‘lmasligini ta’kidladi.

“Bir iltimosim bor sizlardan. Tarix bor, avval o‘ynagan futbolchilar bor, avvallari mana shunday musobaqalarda ishtirok etilganining tajribasi ham bor. Jahon chempionatiga chiqib, unda muvaffaqiyatli qatnashib, mashinalar berilgan o‘sha vaqtda ham. O‘sha vaqtda mashinalarni haydab, har xil o‘rtoqlar paydo bo‘lib, mashg‘ulotlar qolib ketgan. Mashhurlikka o‘rtoq bo‘lmaydi. Shuning uchun bunday o‘rtoqlarni yoninglarda yurgan bo‘lsa haydanglar. Bizning vaqtimiz yo‘q qayerlagadir ziyofatlarga borishga. Sportchi bunday bo‘lmaydi. Bir narsaga erishish uchun boshqa narsani qurbon qilish kerak. Vaqt tez o‘tadi, uning qadrini bilishimiz kerak. Vaqtning bir daqiqasini ham bekor o‘tkazmasligimiz kerak”, – deydi Ravshan Ermatov.

O‘FA birinchi vise-prezidenti faqat tayyorgarlik qilish orqali keyingi natijalarni yaxshi qilish mumkinligini ta’kidladi.

“Katta-katta futbolchilar bo‘lib, samolyotinglar bo‘lsin, lekin samolyot olganda ham oyoqlaring yerdan uzilishi kerakmas. Hech qachon manmanlikka berilish kerakmas. Har doim oddiy bo‘lish kerak. Shundagina Xudo ham yo‘linglarni ochadi. Og‘ir-bosiqlik bilan, murabbiyinglar bergan taktika bilan, bergan ko‘rsatmalar bilan ish qilsak, hech qachon adashmaymiz. Ruhan kuchli ekanliklaringni maydonda ko‘rsatdinglar, shu ruh bilan keyingi musobaqaga ham tayyorgarlik ko‘rsanglar hech kim halaqit qilolmaydi”, – deya qo‘shimcha qilgan Ermatov.

Eslatib o‘tamiz, O‘zbekiston o‘smirlar terma jamoasi finalda Saudiya Arabistoni jamoasini 2:0 hisobida mag‘lub etib, bosh sovringa ega chiqdi. Ta’kidlash kerakki, Islombek Ismoilov jamoasining ikki nafar a’zosi birinchi taymning oxirida qizil kartochka olib, maydondan chetlashtirilgan edi. Ammo yakunda jamoa iroda ko‘rsatib, ikki marta raqib darvozasini ishg‘ol qilishni uddaladi.