"Aston Villa" o‘z hujumchisi Morgan Rojersga APL gigantlarining qiziqishini to‘sishga tayyor.
Yaqinda Rojers yozgi transfer oynasida "Chelsi"ning nishoniga aylangani xabar qilingandi. "Ko‘klar" agar Chempionlar ligasiga yo‘llanmani qo‘lga kirita olmasa, "Aston Villa" zaif holatda bo‘lishiga ishonmoqda.
Daily Mirror nashri xabariga ko‘ra, Rojersga nafaqat "Chelsi", balki "Arsenal", "Nyukasl" va uning sobiq jamoasi "Manchester Siti" ham qiziqmoqda.
"Aston Villa" yozda bir qancha o‘yinchilarni sotishni rejalashtirayotgan bo‘lsa-da, Rojers ular orasida emas. Birmingem klubi Morganni kelajak rejalarining asosiy qismi deb biladi.
Eslatib o‘tamiz, joriy mavsum 22 yoshli Rojers 14 ta gol urdi va 13 ta golli uzatmani amalga oshirdi hamda Angliya terma jamoasiga ilk chaqiruvini ham oldi.













