Superliganing 8-turidan o‘rin olgan «Bunyodkor» — «Qo‘qon-1912» uchrashuvidan so‘ng mehmonlar bosh murabbiyi Bahrom Haydarov fikrlari bilan o‘rtoqlashdi.

“Bugungi o‘yin teng kurashlar ostida o‘tdi, o‘yin avvalida biroz bo‘shashdik, futbolchilarda o‘z kuchiga ishonch bo‘lmadi. Shu sababli oldinga o‘ynashga qo‘rquv bo‘ldi, bu yakunda golga olib keldi. O‘yin davomida goldan keyin yigitlar o‘ziga kelib oldi, keyingi daqiqalar tayyorlagan rejamiz asosida kechdi. Hozir hissiyotlar ko‘p. Bir so‘z bilan aytganda haqli g‘alabaga erishdik. Yutqazayotgan vaqtimizda ham o‘z rejamizdan chekinmadik”, — deydi Bahrom Haydarov.

- Bugungi g‘alabani omadga qiyoslash mumkinmi? «Qo‘qon-1912» aytarli vaziyat yarata olgani yoʻq...

- Darvozabon xatosini olsak omadli vaziyat edi deyish mumkin. Bu rejalashtirilgan narsa emasdi. Mutaxassislar ham ko‘rdi, jamoam oxirgi daqiqagacha kurashdi. Haqli g‘alaba qo‘lga kiritildi. Butun o‘yin davomida himoyalanib, qarshi hujumda imkoniyatlarimizni kutdik.

- Qo‘l ostingizdagi tarkib bilan butun mavsum davomida barqaror o‘yin ko‘rsata olishingizga ko‘zingiz yetyaptimi? Zaxira imkoniyatlaringiz qanday?

- Albatta teng kuchli tarkib yig‘ishga harakat qildik. Futbolchilarning ko‘pchiligi o‘tgan yili Pro ligada qatnashishgan. Ular kundan-kunga o‘smoqda. Tarkibga Superligani ko‘rgan bir necha nafar tajribali futbolchilarni ham jalb qildik. Biz murabbiylar shtabiga ham ko‘p narsa bog‘liq. Futbolchilarning jismoniy holatini bir maromida ushlay olishimiz kerak. Hozircha o‘ylaganlarimiz amalga oshmoqda.