Peru poytaxti mezbonlik qilayotgan og‘ir atletika bo‘yicha o‘smirlar va yoshlar o‘rtasidagi Jahon chempionatidan xushxabarlar kelishi davom etmoqda! Yakunlangan kunda o‘tkazilgan bellashuvlarda ishtirok etgan sportchilarimiz 3 ta oltin va 2 ta kumush, jami 5 ta medalga sazovor bo‘lishdi.

Jumladan, ayollar o‘rtasida +81 kg vazn toifasida supachaga ko‘tarilgan andijonlik mahoratli sportchimiz Mohinur Esonboyeva dast ko‘tarishda 98 kg natija bilan kumush medalga sazovor bo‘lgan bo‘lsa, siltab ko‘tarishda (127 kg) va ikkikurash yakuniga ko‘ra (225 kg) barcha raqiblarini ortda qoldirgan holda 2 ta oltin medalni delegasiyamiz hisobiga qo‘shib qo‘ydi.

Shuningdek, erkaklar o‘rtasida -102 kg vazn toifasida yurtimiz sharafini himoya qilgan Toshkent viloyati vakili Alisher Osmanovga dast ko‘tarishda teng keladigan raqib topilmadi. Vakilimiz 146 kg toshni bo‘ysundirib, oltin medalni qo‘lga kiritdi. Bundan tashqari, sportchimiz siltab ko‘tarishda 170 kg hamda ikkikurashda 316 kg natija qayd etgan holda yana 2 ta kumush medalga sazovor bo‘ldi.