Poytaxtimizdagi «Paxtakor» qilichbozlik sport majmuida kattalar o‘rtasida O‘zbekiston chempionati bahslari bo‘lib o‘tmoqda.
Qoraqalpog‘iston Respublikasi, viloyatlar hamda Toshkent shahridan 90 nafarga yaqin sportchi qilichbozlikning shpaga, rapira va sablya yo‘nalishidagi yakkalik hamda jamoaviy bellashuvlarda chempionlik uchun kurash olib boryapti.
4 may kuni shpaga bo‘yicha o‘tkazilgan yakkalik bahslarida o‘g‘il bolalar o‘rtasida Meyirxon Temurov (Navoiy), qiz bolalar o‘rtasida esa Biybimaryam Saparova (Qoraqalpog‘iston Respublikasi) g‘oliblik shohsupasining eng yuqori pog‘onasidan o‘rin egalladi. Jamoaviy bahslarda esa «Toshkent-1» (qiz bolalar) va «Andijon-1» (o‘g‘il bolalar) klublari g‘olib bo‘ldi.
Kecha rapira bo‘yicha yakkalik bahslari bo‘lib o‘tdi. Unda Maftuna Davronova (Farg‘ona) tengdoshlari o‘rtasida mohir va abjir ekanligini namoyon etib, g‘olib bo‘ldi. O‘g‘il bolalar o‘rtasida esa Radmir Semeneev (Andijon) g‘oliblik shohsupasining eng yuqori pog‘onasiga ko‘tarildi.
