"Liverpul" "Atalanta" hujumchisi Ademola Lukmanga qiziqish bildirmoqda va vinger Federiko Kyezani ehtimoliy shartnomaga qo‘shishi mumkin, deb xabar beradi Quotidiano Sportivo.
Manbaga ko‘ra, ingliz klubi 27 yoshli nigeriyalik futbolchini qishda o‘z safiga qo‘shib olmoqchi bo‘lgan. O‘shanda ham mersisaydliklar Kyezani mumkin bo‘lgan kelishuvga qo‘shish imkoniyatini ko‘rib chiqishgan, ammo "Atalanta" Lukmanni mavsumning hal qiluvchi bosqichi oldidan qo‘yib yuborishni istamagan.
Italiya klubi Lukmanning sotuvi uchun 60 million yevro olmoqchi va transfer summasiga yon bermoqchi emas.
Kyezaning "Atalanta"ga o‘tishidagi mumkin bo‘lgan to‘siqlar orasida futbolchining yuqori maoshi, shuningdek, jamoa murabbiyining kelajagiga oid noaniqlik ham bor.
Kyeza joriy mavsumda “Liverpul” safida barcha turnirlar doirasida 13 ta o‘yin o‘tkazib, 2 ta gol urdi va 1 ta golli uzatmani amalga oshirdi.
