"Lion" yarim himoyachisi Rayan Sherkiga Yevropaning nufuzli klublari qiziqish bildirishda davom etmoqda.
21 yoshli futbolchi yaqinlashib kelayotgan transferlar davrida "to‘quvchilar" safini tark etishini uning o‘zi e’lon qildi. Jurnalist Ekrem Konurning ma’lum qilishicha, hozirda "Manchester Yunayted" va Dortmundning "Borussiya" klublari umidli fransuz uchun asosiy da’vogarlar bo‘lib turibdi. "Qizil iblislar" va "asalarilar" yetakchi chempionatlarning boshqa ko‘plab vakillari ko‘z ostiga olib qo‘ygan o‘yinchini o‘z tomoniga og‘dirib olishga qat’iy bel bog‘lagan.
Rayan Sherki 2024/25-yilgi mavsumda 44 ta o‘yinda 12 ta gol urdi va 20 ta golli uzatmani amalga oshirdi. Transfermarkt portali hujumkor yarim himoyachining narxini 35 mln yevroga baholamoqda.
