"Лион" ярим ҳимоячиси Райан Шеркига Европанинг нуфузли клублари қизиқиш билдиришда давом этмоқда.

21 ёшли футболчи яқинлашиб келаётган трансферлар даврида "тўқувчилар" сафини тарк этишини унинг ўзи эълон қилди. Журналист Экрем Конурнинг маълум қилишича, ҳозирда "Манчестер Юнайтед" ва Дортмунднинг "Боруссия" клублари умидли француз учун асосий даъвогарлар бўлиб турибди. "Қизил иблислар" ва "асаларилар" етакчи чемпионатларнинг бошқа кўплаб вакиллари кўз остига олиб қўйган ўйинчини ўз томонига оғдириб олишга қатъий бел боғлаган.

Райан Шерки 2024/25-йилги мавсумда 44 та ўйинда 12 та гол урди ва 20 та голли узатмани амалга оширди. Transfermarkt портали ҳужумкор ярим ҳимоячининг нархини 35 млн еврога баҳоламоқда.