Londonning “Chelsi” klubi bosh murabbiyi Enso Mareska APLning 38-turi doirasidagi “Nottingem Forest”ga (1:0) qarshi o‘yindan so‘ng, “ko‘klar”ning mavsum yakunlari haqida gapirdi. Jamoa Angliya chempionati turnir jadvalida to‘rtinchi o‘rinni egalladi va Chempionlar ligasining keyingi mavsumiga yo‘llanma oldi.

"Men ko‘p sabablarga ko‘ra juda xursandman. Birinchi navbatda, futbolchilar bunga loyiq bo‘lgani uchun, ular birinchi kundanoq astoydil harakat qilishdi, borlarini berishdi. Klub, futbolchilar, rahbariyat - barchamiz bir yo‘nalishda harakat qildik.

Biz yo‘ldamiz, o‘yin uslubimizga sodiq qolgan holda natijalarga erishmoqchimiz. O‘ylaymanki, bugun futbolchilar eng yaxshi o‘yin ko‘rsatishdi, chunki biz to‘p bilan ishimizni biroz o‘nglab oldik. Bunday muhitda o‘ynash oson bo‘lmadi, lekin futbolchilar buni yaxshi uddalashdi.

O‘ylaymanki, biz yanvar oyidan beri juda ko‘p yaxshi o‘yinlar o‘tkazdik, garchi OAV bu haqda ko‘p gapirmasa ham. Bugun biz klub uchun muhim maqsadga erishdik, bu quvonarli", - deya Mareskaning so‘zlarini keltiradi "Chelsi" rasmiy sayti.