Лондоннинг “Челси” клуби бош мураббийи Энцо Мареска АПЛнинг 38-тури доирасидаги “Ноттингем Форест”га (1:0) қарши ўйиндан сўнг, “кўклар”нинг мавсум якунлари ҳақида гапирди. Жамоа Англия чемпионати турнир жадвалида тўртинчи ўринни эгаллади ва Чемпионлар лигасининг кейинги мавсумига йўлланма олди.

"Мен кўп сабабларга кўра жуда хурсандман. Биринчи навбатда, футболчилар бунга лойиқ бўлгани учун, улар биринчи кунданоқ астойдил ҳаракат қилишди, борларини беришди. Клуб, футболчилар, раҳбарият - барчамиз бир йўналишда ҳаракат қилдик.

Биз йўлдамиз, ўйин услубимизга содиқ қолган ҳолда натижаларга эришмоқчимиз. Ўйлайманки, бугун футболчилар энг яхши ўйин кўрсатишди, чунки биз тўп билан ишимизни бироз ўнглаб олдик. Бундай муҳитда ўйнаш осон бўлмади, лекин футболчилар буни яхши уддалашди.

Ўйлайманки, биз январ ойидан бери жуда кўп яхши ўйинлар ўтказдик, гарчи ОАВ бу ҳақда кўп гапирмаса ҳам. Бугун биз клуб учун муҳим мақсадга эришдик, бу қувонарли", - дея Маресканинг сўзларини келтиради "Челси" расмий сайти.