Londonning "Chelsi" klubi yarim himoyachisi Koul Palmer Konferensiyalar Ligasi finalida "Betis"ga qarshi o‘yinda jamoadoshlariga ikki marta golli uzatma berdi.
65-daqiqada inglizning uzatmasidan so‘ng Enso Fernandes, yana besh daqiqadan so‘ng esa Nikolas Jekson gol urdi. Shu tariqa "ko‘klar" o‘yinda, 2:1 hisobida oldinga chiqib olishdi. Opta portalining qayd etishicha, Palmer 2018 yildan buyon yevrokuboklar finalida ikkita golli pas bergan ilk futbolchi bo‘ldi. Yetti yil oldin "Real"ning chap qanot himoyachisi Marselo Chempionlar Ligasi finalida "Liverpul"ga qarshi o‘yinda bu ishni uddalagandi.













