FIFA Braziliya futbol konfederasiyasiga (CBF) Karlo Anchelottini erkaklar terma jamoasi bosh murabbiyi etib tayinlashda futbol agentlari to‘g‘risidagi nizom buzilgan bo‘lishi mumkinligi sababli surishtiruv o‘tkazish zarurligi haqida xabar berdi. Bu haqda Ge.Globo nashri yozmoqda.

Gap agent Diyego Fernandes uchun belgilangan €1,2 millionlik komissiya haqida ketmoqda.

FIFA Diyego Fernandesning roli borasida shubhalanmoqda, chunki u so‘nggi kunlarda Anchelotti bilan doimiy ravishda birga bo‘lgan va uning Braziliyaga yetib kelib, CBFda rasman tanishtiruv marosimigacha hamrohlik qilgan.

FIFA CBFdan Diyego Fernandes bilan rasmiy aloqalarni taqdim etishni, shuningdek, quyidagi masalalar yuzasidan tushuntirishlar berilishini talab qilgan:

— mazkur ish bo‘yicha, ayniqsa, shartnoma imzolashda Diyego Fernandesning roli haqida CBFning qisqacha bayonoti;

— shartnoma bilan bog‘liq, ayniqsa, Diyego Fernandesga taalluqli bo‘lgan har qanday yozishmalar;

— shartnoma imzolanishi munosabati bilan CBF tomonidan amalga oshirilgan barcha to‘lovlar nusxalari;

— CBF va Diyego Fernandes o‘rtasidagi har qanday kelishuvlar.