ФИФА Бразилия футбол конфедерациясига (CBF) Карло Анчелоттини эркаклар терма жамоаси бош мураббийи этиб тайинлашда футбол агентлари тўғрисидаги низом бузилган бўлиши мумкинлиги сабабли суриштирув ўтказиш зарурлиги ҳақида хабар берди. Бу ҳақда Ge.Globo нашри ёзмоқда.

Гап агент Диего Фернандес учун белгиланган €1,2 миллионлик комиссия ҳақида кетмоқда.

ФИФА Диего Фернандеснинг роли борасида шубҳаланмоқда, чунки у сўнгги кунларда Анчелотти билан доимий равишда бирга бўлган ва унинг Бразилияга етиб келиб, CBFда расман таништирув маросимигача ҳамроҳлик қилган.

ФИФА CBFдан Диего Фернандес билан расмий алоқаларни тақдим этишни, шунингдек, қуйидаги масалалар юзасидан тушунтиришлар берилишини талаб қилган:

— мазкур иш бўйича, айниқса, шартнома имзолашда Диего Фернандеснинг роли ҳақида CBFнинг қисқача баёноти;

— шартнома билан боғлиқ, айниқса, Диего Фернандесга тааллуқли бўлган ҳар қандай ёзишмалар;

— шартнома имзоланиши муносабати билан CBF томонидан амалга оширилган барча тўловлар нусхалари;

— CBF ва Диего Фернандес ўртасидаги ҳар қандай келишувлар.