"Atletik" hujumchisi Niko Uilyams hamon transfer bozoridagi eng talabgir futbolchilardan biri bo‘lib qolmoqda. AS xabariga ko‘ra, yosh futbolchi uchun asosiy da’vogarlar Londonning "Chelsi" va "Arsenal" klublari hisoblanadi.
Manbaning yozishicha, har ikki klub ham transfer amalga oshishi uchun qo‘lidan kelgan barcha ishni qilmoqchi. Avvalroq, Uilyamsning Ispaniyada qolish istagi borligi haqida mish-mishlar tarqalgan edi, ammo "Barselona"ning kelishuvni amalga oshira olmasligi Nikoni xorijga ketish haqida o‘ylashga majbur qilishi mumkin.
Eslatib o‘tamiz, Uilyamsning shartnomasida 55 million yevro tovon puli ko‘rsatilgan, biroq bitim katta agentlik to‘lovlarini ham talab qiladi. Bilbaoning "Atletik" klubi hozirda o‘z tarbiyalanuvchisi bilan shartnomani uzaytirish ustida ishlamoqda.
