"Milan"ning sobiq futbolchisi, hozirda murabbiy bo‘lib ishlayotgan Jennaro Gattuzo yaqin vaqt ichida Italiya terma jamoasi bosh murabbiyi lavozimini egallaydi. Bu haqda ijtimoiy tarmoqlar orqali insayder Janluka di Marsio xabar bermoqda.
Jurnalistning ma’lumotiga ko‘ra, tomonlar yaqin kunlarda bitim tuzadi. Eslatib o‘tamiz, o‘tgan haftada "skuadra adzurra" bosh murabbiyi lavozimini Luchano Spalletti tark etgan edi.
Gattuzoning so‘nggi ish joyi Xorvatiyaning "Xayduk" klubi bo‘lgan. Italiyalik mutaxassis joriy oy boshida jamoani tark etgandi. Bungacha uning murabbiylik faoliyatida "Marsel," "Napoli," "Valensiya" va boshqa klublar bo‘lgan.
