Yurtimizda sportni yanada rivojlantirish, yosh avlodni sog‘lom va jismonan yetuk qilib tarbiyalash borasida tizimli ishlar amalga oshirilmoqda. Xususan, sport turlari ichida aynan futbolga bo‘lgan e’tibor bugungi kunda davlat siyosati darajasiga ko‘tarildi.
O‘zbekiston Respublikasi Prezidentining “O‘zbekistonda futbolni rivojlantirishni mutlaqo yangi bosqichga olib chiqish chora-tadbirlari to‘g‘risida”gi Farmoni imzolangach, millionlar o‘yini bo‘lgan va mamlakatda alohida o‘rin tutadigan futbolga aholini, ayniqsa, yoshlarni keng jalb etish bo‘yicha tizimli ishlar amalga oshirilib kelinmoqda. Ayniqsa, bu yo‘lda professional futbol klublarining akademiyalarini qurish, mavjudlarini jahon talablari darajasida rekonstruksiya qilish va yoshlarni sifatli saralab olish jarayonlari dolzarb ahamiyat kasb etgan.
Shu munosabat bilan bugun Jizzax shahrida viloyatimizning bosh jamoasi bo‘lgan “So‘g‘diyona” klubi qoshida zamonaviy va barcha qulayliklarga ega bo‘lgan futbol akademiyasining ochilish marosimi bo‘lib o‘tdi. Unda viloyat hokimi vazifasini bajaruvchi Ulug‘bek Mustafoyev, O‘zbekiston futbol assosiasiyasidan mas’ullar, vohadagi turli tashkilot rahbarlari, nuroniylar, faollar, sportchilar hamda keng jamoatchilik vakillari ishtirok etdi.
Tadbirni viloyat rahbari Ulug‘bek Mustafoyev kirish so‘z bilan ochib, mamlakatimizda so‘nggi yillarda sport, jumladan futbolni rivojlantirishga bo‘lgan e’tibor kuchayayotganligi, olis hududlardagi yosh charm to‘p ustalarini saralab olishda bosqichma-bosqich tizimli ishlar yo‘lga qo‘yilganligi va yurtimizda bu kabi akademiyalarning ko‘payishi professional futbol klublarimizning ichki va xalqaro miqyosdagi natijalariga ijobiy ta’sir ko‘rsatishini alohida ta’kidladi.
Ma’lumki, ayni paytda milliy terma jamoamiz safida ikki nafar jizzaxlik futbolchilar – Abduvohid Ne’matov hamda Ruslanbek Jiyanov harakat qilishadi. Biroq ular boshqa viloyat klublari akademiyalarida futbol sir-asrorlarini o‘rganib, yuqori darajaga chiqishdi. Vohamizning asosiy jamoasiga yetuk kadrlarni yetkazib beruvchi ushbu akademiyaning qad rostlashi endi mahalliy yoshlar uchun katta futbolga ochilgan muhim eshik vazifasini o‘taydi.
Shuningdek, tadbir davomida O‘zbekiston futbol assosiasiyasi birinchi vise-prezidenti maslahatchisi Rahmiddin Zikriyoyev ham so‘zga chiqib, mamlakatda futbolni rivojlantirishda akademiyalarning ahamiyati yuqori ekanini qayd etar ekan, ularning asosini mustahkam qilib shakllantirish har bir professional futbol klubining muhim vazifalaridan biri ekanini aytib o‘tdi. Bu borada futboli rivojlangan xorij akademiyalari tajribasidan faol ravishda foydalanish zarurligi ham ta’kidlandi.
Shundan so‘ng tadbir ishtirokchilari futbol akademiyasida yaratilgan sharoitlar bilan atroflicha tanishib chiqdi. Jumladan, ushbu majmuada bir vaqtning o‘zida 6 ta yosh toifasi bo‘yicha 120 nafar yosh charm to‘p ustalari amaliy va nazariy jihatdan kerakli sport ko‘nikmalarini o‘zlashtirishi ko‘zda tutilgan. Shuningdek, akademiya tarkibida barcha qulayliklarga ega 3 ta futbol maydoni (1 ta tabiiy, 2 ta sun’iy qoplamali), yirik sport zal, suzish havzasi, yotoqxona, oshxona hamda kutubxonalarning ham mavjudligi kishi ko‘zini quvontiradi. Umid qilamizki, ushbu akademiyadan professional futbolga qadam qo‘yajak mahalliy yoshlarimiz mamlakat hamda jahon miqyosida katta yutuqlarga erishib, Vatanimiz bayrog‘ini doim yuqoriga ko‘tarishadi.
