O‘zbekiston terma jamoasi va Italiyaning "Roma" klubi hujumchisi Eldor Shomurodov YouTube'dagi "Nobel" kanaliga bergan intervyusida "Manchester Siti" himoyachisi Abduqodir Husanov haqida jamoadoshlari bilan qilgan hazillar borasida gapirdi.

— So‘nggi ikki yilda senga Italiyada O‘zbekiston haqida qanchalik tez-tez savol berishadi? Masalan, Dibala yoningga kelib, “Eldor, bu "Manchester Siti"ga o‘tgan bola kim o‘zi?” yoki “Sizlar jahon chempionatiga chiqyapsizlarmi?” deb so‘ramaydimi?

— Yo‘q. Ular doim Yevropada o‘ynaganlar haqida so‘rashadi. Husanov haqida ham ko‘p so‘rashgan. Ilgariroq esa: “Sen Yevropada yolg‘iz o‘ynaysanmi?”, deb so‘rashardi. Men “Ha” derdim. Ular esa: “Unda sen qirolsan”, deyishardi. Endi esa hazillashib: “O‘zbekistonda yangi qirol paydo bo‘libdi. Husanov endi katta jamoada o‘ynayapti, uning nufuzi sendan yuqori”, deyishyapti.

— Sen nima deb javob berasan?

— “Ha, rostdan ham shunday”, deyman. Uning plankasi mendan yuqori.