Ўзбекистон терма жамоаси ва Италиянинг "Рома" клуби ҳужумчиси Элдор Шомуродов YouTube'даги "Nobel" каналига берган интервьюсида "Манчестер Сити" ҳимоячиси Абдуқодир Ҳусанов ҳақида жамоадошлари билан қилган ҳазиллар борасида гапирди.

— Сўнгги икки йилда сенга Италияда Ўзбекистон ҳақида қанчалик тез-тез савол беришади? Масалан, Дибала ёнингга келиб, “Элдор, бу "Манчестер Сити"га ўтган бола ким ўзи?” ёки “Сизлар жаҳон чемпионатига чиқяпсизларми?” деб сўрамайдими?

— Йўқ. Улар доим Европада ўйнаганлар ҳақида сўрашади. Ҳусанов ҳақида ҳам кўп сўрашган. Илгарироқ эса: “Сен Европада ёлғиз ўйнайсанми?”, деб сўрашарди. Мен “Ҳа” дердим. Улар эса: “Унда сен қиролсан”, дейишарди. Энди эса ҳазиллашиб: “Ўзбекистонда янги қирол пайдо бўлибди. Ҳусанов энди катта жамоада ўйнаяпти, унинг нуфузи сендан юқори”, дейишяпти.

— Сен нима деб жавоб берасан?

— “Ҳа, ростдан ҳам шундай”, дейман. Унинг планкаси мендан юқори.