Super og‘ir vazn toifasidagi o‘zbekistonlik professional bokschi Bahodir Jalolov navbatdagi jangi sanasi va raqibi ma’lum bo‘ldi. Top Rank promouterlik kompaniyasi tomonidan tashkil etiladigan jang 26 iyul kuni Nyu-Yorkda bo‘lib o‘tadi.

O‘sha kuni o‘zbekistonlik sportchiga 36 yoshli italiyalik Janmarko Kardilo raqiblik qiladi. Madison Square Garden arenasida o‘tadigan jang 10 raundga mo‘ljallangan.

Italiyalik bokschi shu paytga qadar professional boksda 15 ta jang o‘tkazib, ularning 12 tasida g‘alaba qozongan, 2 ta bahs durang bilan yakunlangan va yana bitta uchrashuvda imkoniyatni boy bergan. Qiziqarli tomoni shundaki, uning barcha janglari Italiyada bo‘lib o‘tgan.

Ma’lumot uchun, Bahodir Jalolov shu kunga qadar professional boksda 15 marta jang o‘tkazib,  ularning 14 tasida muddatidan avval g‘alaba qozongan bo‘lsa, bir bahsda ochkolar hisobiga raqibdan ustun kelgan.

Jalolov oxirgi jangini 5 aprel kuni Qozog‘istonning Ostona shahrida ukrainalik Igor Shevadzuskiyga qarshi ringga ko‘tarilib, hakamlarning yakdil qaroriga ko‘ra g‘alaba qozongan edi.